ایواز طاهادان بیر اویکو
بير اوتاقدا بئش قوناق
ايواز طاها
بوردا بيز بئش آدامیق. آمما سويوموز بير يئره گئتمير. بيزيم بئشيميز ده آيري بير گؤزله پنجره‌يه، چيراغا، چيركلي ديوارا، دؤشهمهيه باخير. سيقارئت كؤزويله دليك دئشيك اولموش دؤشهمهيه. باخيشلاريميز او قدهر دَييشيکدير كي، ائله بيل هره‌ميز آيري بير گزه‌يندن [سياره‌دن] گليب. منجه، تاوانا بيتيشميش خيرداجا پنجره، ايشيق رمزيدير. بو گومان منه ائله لذت ائدير كي، اوردا اوچ رديف دوزولموش دمير داراقلاري دا گؤرمك ايسته‌ميرم. ايکينجي سوروجو پنجره‌ني خوشلامير. دئيير: قيشدا بو پنجره‌دن ايچهري سوخولان سويوق، سومويو اوشودور. گولشچي بيرينجي كز بورا قوناق گلدييینه باخماياراق، اونون سؤزونو اوسته‌له‌يير. بو پنجره‌نين شوشه‌سي يوخدور. اوتاغين اورتاسينداکي ديره‌يين باشينا فيرلانان سوباي كيشي‌نين ده پنجره‌دن زهله‌سي گئدير. تؤوشويه تؤوشويه دئيير:
ـ بوردا گئجه تئز گليب كئچير، اونون آز بؤلومونو اوياق قالير، چوخ بؤلومونو باشيني آتيب ياتيرسان، آمما بو پنجره‌دن باخديقجا گوندوز قورتارمير. اوردا گونشي گؤرمورسن، صوبحدن گون‌اورتايا، گون‌اورتادان گون‌باتانا فيرلانديغيني دويمورسان. تكجه گونشسيز گؤيو گؤرورسن. هردن بير بولودلار گليب كئچمه‌سه، سانكي بير آغ تابلويا باخيرسان. داريخيرسان.
بو سؤزلری بيز ده ازبرله‌ميشيک، گونده اون دفعه دئيير. گولشچي داريخمير، آمما دؤشه‌مه‌نين اوزه‌رينه قونان يومرو ايشيق، اونا سون ياريشينداکي دايره گولش دؤشه‌ييني خاطيرلادير.
باشقالاري دا نسه دئيير، من ده يازيرام. اونلار دئديييني يازميرام، اوشاقليقدان قالما بير عادت‌دير منده. ال‌لريني قولاقلارينا باسميش بيرينجي سوروجو باياقدان بري گؤزونو زيلله‌ييب منيم اليمه. آغزيمي آچيرام کي، نسه دئييم، اليمده‌کي كاغيذي قاپير، دوشور ميغميغالارين جانينا. آز قالير جانيم چيخسين. آخي دونندن او كاغيذين اوزه‌رينده قورخا قورخا بو حئکايهني يازيرام، اؤزگه بير آدام ايچهري گيرديكده ايسه اونو ياستيغيمين آلتينا باسيرام. اليمي اوزاديرام، سوروجو يئنه ده اليني قالديرير، کاغيذي اؤز باشينين اوسته فيرلادير. وئر منه، وئر منه کاغيذي، کيمه دئيهرسن. گولشچي سيچراييب، كاغيذي قاپير، منه وئرير. ال‌لريم تيتره‌يه تيتره‌يه گؤزلويومو، يئر به يئر ائديب، كاغيذي هؤله‌سك گؤزدن كئچيرمك ايسته‌ييرم. آمما گؤزومده گؤزلوك يوخدور. اونو تحويل وئردييیمي اونوتموشام. هر نه‌‌يي مندن آليب‌لار، قاييشيمين توتقاسيناجان، كیبريتيمه‌جن، آچاريماجان، اوچ بئش قيران پولوماجان.
گيج گيج هله ده پنجره‌ني دوشونوركن، قاپي‌نين باجاسيندان بئش كاسا سولو لوبيا ايچهري قويولور. سوروجو، يئسم اؤله‌رم، گولشچي، بدنيم بونلاري چكمز، دئيير. سوباي کيشي چيمچهشير، انصافسيزلار دَنيني اؤزلري يئييب، سويونون آرتيغيني بيزه وئريب‌لر. گولشچي ايله ايكي سوروجو قاپيني دؤيورلر، جاواب گلمير. اوجادان دؤيورلر، جاواب گلمير. قاپيني سينديرماغا باشلاييرلار، آنلاشيلماز جاواب گلجه‌يين باغیریرلار:
ـ بو نهدي بيزه وئريبسيز؟ اؤز پولوموزلا گئدين بيزه بوزباش آلين گتيرين آخي!
جيبلرينده پارا وار. پارالاري گؤره‌ن کيمي چاشيب قاليرام. شالوارلارينين قاييشي دا بئللريندهدير، لاپ قاپيلارينين آچاري دا ال‌لرينده. کاسالارا ياخينلاشيرام، بيريني قاباغيما چكيرم. سوروجولر يئمك گلينجه دئييتله‌شيرلر. بو كؤپك اوغلو تزه ماشينيیلا گلير بيز دوران داياناجاقدا دايانير، بونا مينيرلر، منيم كؤهنه ماشينيما مينميرلر. او بيري سوروجو آستا سسله، آخي منيم قرارداديم وار دئيير.
- جهنمه كي قراردادين وار، من ايگيرمي ايلدي بو خطده ايشدئييرم، سن اوچ گون دؤيور گليب‌سن، كئچئيسن صفين باشينا.
- ايگيرمي ايل ده ايشده‌سن ايشين قانوني دؤيور.
- من قانونو صاباح سنه گؤركزه‌رم.
- اليننن گله‌ني بئش قابا چك.
- ككجين بيري، ككج. دلي شيطان دئيير گؤزدريني چيخارت آت اووجونا.
گولشچي اوغونور كئچير. دوداغيمين يان‌يؤره‌سيني يالاييب، آغزيمداكي لوخماني اودورام. گؤز اوجو اونلارا باخيرام: بير آز توختاق! دالاشمايين آ بالا! بير گون بيرينيز گئدين، او بيريسي گون ايسه او بيرينيز! بيرينجي سوروجونون اود گؤتورمه‌يي ايشي بؤيودور. قالخير ايكينجي سوروجونون اوستونه جومور، قابيرغالاريني دؤشه‌يير يومروغون آغزينا. من هارايچيليغا قالخار قالخماز، بيرينجي سوروجونون يان كئچن يومروغو اَيله‌شير آلنيمين اورتاسيندان. اوزو قويلو يئره قاپانيرام. اينديه‌جن، هيريلدايان گولشچي آتيليب، اؤکوز بويدا بيرينجي سوروجونو ياخالايير. دارتينماغا ماجال وئرمير، سوپوروپ يئره باسير. ايندي اوره‌كله‌نميش ايكينجي سوروجو، بير آز سؤيوشدن سونرا توختايير. بو آدام هئچ نه‌يه جدي ياناشمير. آمما او بيريسي هله ده حربه زوربا گلير. او آجيغيندان نعره چكديده، ايكينجي سوروجو منه گؤز وورور. هئچ دئييرسن باياقدان بري دؤيولن آدام بو دئييل. او، قولاغينا سامان تپسه ده، ائشيتمه‌ديييميز سؤيوش‌لري بيرينجي سوروجودن اؤيره‌نيريك. آدام، بؤيوكدن توتدو اوشاغاجان، قوهومنان توتدو قونشوياجان، هاميسيني سؤيور:
ـ سنسن بوتون آراني قاتان تولکو! ائششک اوغلو ائششک!
ـ يالانچی! آخير کی، بللی اولمادی تولکو يا ائشششک؟
ـ دانيشما آوارانين بيري آوارا، آرسيزين اوغلو آرسيز، ايكينجي سوروجو باغيرير.
دوداغيمدا ميزيلدانيرام: يالان و يامان. بونلارين هر ايكيسي ياشاييشين آيريلماز بؤلومودور. بورا اؤز آراميزدي، يامان، دوشونجه‌دن داها آرتيق موحاربه‌لرين قاباغيني آلير. بشر ساواشين يئرينه دوشونمه‌يي باجارماسا دا، ساواشماق يئرينه يامانلاشماغي يامان باجارير. ميغ‌ميغا آرتيق دوشونمه‌يه آمان وئرمير. اؤنجه بورنومون اوجوندان سانجير، سونرا آياغيمين باش بارماغيندان. قاشينما بارماغيمدا دويونله‌نير. باش بارماغيمي چتين‌ليك‌له ساليرام آغزيما، چئينه‌ييرم. بورنوما ال آتار آتماز، ميغ‌ميغانين بير يئكه‌سي آلنيما قونور. اووجومون ايچييله شاراپ ياپيشديريرام آلنيما. آلنيما ياخيلان بؤجهيين قاني اووجوما جالانير. قانلي اليمين الينده قالميش حالدا گولشچي دئيير:
ـ آتام! او، بئينينده‌كي يالان ياماني بوراخ، اليني سورت يئره، نه‌يه ببك قالميسان؟
ـ دانيشما آ بالا! گؤرمورسن او گئنيشليكده حياتين وورنوخماسي بير آن منيم بو آلنيمدا سوسدو.
گولشچي‌نين الي دونن قانا بولاشميشدي. هله ده گوللو کؤينه‌يينده اونون الينده دؤيولن‌لرين قاني دورور:
ـ من اللريمي يودوم، سن سورت يئره.
□
تاوانا باخيرام، هؤرومچه‌يين تورونا. ايندي گئجه‌نين بو چاغيندا تاوانا بيتيشميش او پنجره‌دن، خيرداجا بير لامپانين ايشيغي ايچهري سوزور. ايشيغين تئل‌لري شئيطان تورونا توخونوركن، نارين هؤرومچه‌يين كؤلگه‌سي ديواردا جاناوار بويدا گؤرونور. هميشه هؤرومچه‌يي خوش خبر سانميشام، آمما ايندي بو بويدا جاناوار هانسي خوش خبري گتيره بيلردي آخي؟
باييردا، کؤلگه‌لر قايناشير. سانکي يووارلاق بير جيزگي ايچهريسينده بير بيرلريني قووورلار. بو قايناشمانين ايزي، او بالاجا باجادان دويولور. تاوانا باخيرام، اولمايا شهر قاریشيب، ديکتاتور ييخيليب. سوروجو دئيير، آ كيشي شهر نهدي، ديکتاتور کيمدي، قارشيما نهدي؛ ساده‌جه عسكرلر دجل‌ليك ائديرلر.
- بس بو گولـله سسي نه ايدي؟
- نه اولاجاق، بوردا توفنگ‌لري تميزله‌ينده هردن بير گولـله آچيلير، ده‌يير او بيري عسكرين آلنينين اورتاسيندان.
گؤزلريم بره‌لير. سوباي کيشي ديره‌يين باشينا فيرلانير. آرواديمي بوشاديم، چونکي دايیم ديره‌يين باشينا فيرلانيردي، اوشاق‌لاريم دا دوزولوردو اونون آردينا. قاتار کيمي يوورالاق جيزگيده فيرلانيرديلار. سونرا اونلار دايانديقدا، يئر گؤي منيم باشيما فيرلانيردي. بير آن دايانير، يئكه ديش‌لريني منه آغاردير: نه اولدو اوستاد، قورخدون دئيه‌سن! دوز دئيير ده، گولـله سسي ائشيتمه‌ميسن، آلنين اورتاسيندان قان آچيلان گؤرمهميسن؟
ال آياغيمي ييغيشديريرام. اؤزومو اله آلماق ايسته‌ييرم. بو قدهر قورخماياجاقديم آخي. كاغيذي لوله‌له‌ييرم. فيكريمي جايديرماق اوچون بلكه ده آغجاقاناد اووونا چيخماق ياخشي اولاردي. آمما هؤرومچك آمان وئرمير. تاوانا باخيرام، هؤرومچك داها دا آشاغي ائنيب، كؤلگه‌سي داها دا بؤيوب. آرتيق اينانمايا بيلميرم‌كي، بو خبرچي حئيوان خوش خبر گتيره‌نه اوخشاماسين. قورغوشون سسي فيکريمي پوزور. توفنگ آچيلير. يقين عسکرلر دجلليک ائديرلر. گولشچي قاييدير، سوروجولر قاييتمير.
□
هر شئي رؤويادان باشلاندي. آمما بو هؤرومچه‌يين هاردان چيخديغيني بيلميرم. حئيوان‌لار بيزيم اذنيميز اولمادان يوخوموزا آياق باسير، حتتا بو داريسقال اوتاغا سوخولورلار. اوتانماز اوتانماز بعضن خبر ده گتيريرلر. نه رؤوياني وئج‌لرينه آليرلار، نه دمير داراقلاري تانيييرلار. اونلار، مفتيلدن هؤرلموش او كيچيك باجانين آرديندا دا قالميرلار. هر يئره سوخولورلار. او پنجره، سويوغون، ايستي‌نين قاباغيني آلا بيلمه‌ين يئرده، هؤرومچه‌يين يولونو هاردان كسه‌جك؟ او پنجره آنجاق آدامي، الي‌نين هر يئردن اوزولدويونه اينانديرير. آمما من اينانا بيلميرم. من، بورانی هئچ اؤز ايسته‌ييمله سئچمه‌ميشم. گوناورتا چاغي دؤرد بوينو يوغون پيادا تؤكولوب، منی ياخالاييب، تومانچاق حالدا پوليس‌لره وئرديلر. من ايندي بوردايام. آخي بؤيوك ننه‌مين ختم مراسيميني بوراخيب، يئددي دَييرمان ياماجيندا گزينتي‌يه چيخميشديم. يوخ گوناهيم بو دئييلدی. سن دئمه هردن يول يئرييه يئرييه دانيشيرميشام.
دليخانايا آپارديلار. اينجه گؤزلويومون آرخاسيندان دلي‌لري سوزوركن، دلي‌لر تؤكولوب اؤلونجه ووردولار منی. اؤلومو گؤزومله گؤردوم. دلي‌خانا باشچيسي اؤلومو دلي‌لرين اليندن آليب، نييه وورورسوز دئيه سوروشاندا، دلي‌لر دئدي: - بو، دلي‌دي آخي!
اينانديم عاغيللييام. گؤتوروب بورا گتيرديلر. ايندي وضعيت بام‌باشقادير. ايندي اينانيرام كي، گئرچكدن دلييم.
باياقدان بري گؤزلريني تاوانا زيلله‌ييب فيكره دالميش مني، گولشچي‌نين سسي ديكسينديرير:
- اوستاد! نييه دلي‌لر كيمي باخيرسيز، نه اولوب؟
- هئچ!
□
زامان باجادا فيرلانير، گونش قطب‌ده يئرين اوفوقونده فيرلانديغي كيمي. اوردا گون باتمير، آلتي آي اوفوقون اته‌يينده يئرين باشينا فيرلانير.
ـ بوردا گون باتير، دئييرم، آمما زامان بير دايره ايچهريسينده دايیم اؤز باشينا دولانير.
سوباي کيشي دئيير: ـ سن ده بو ساياقلامالارينلا چوروتدون بيزی. سونرا باشلايير زيرين‌زيرين آغلاما. اونا اوميددن دانشيرام: هاچانسا، قاپيني آچير، سني چاغيريرلار. اون ايل، اون بئش ايل، اللي ايل كئچسه ده بو باش وئرير. سونرا چليييني گؤتورور، آغ ساققاليني سيغاللاير، بؤركونو باشينا قويورسان. قاپي‌نين اؤنونده دايانيرسان. دمير داراق‌لار آچيلير. باشيني دؤنده‌ريب گؤز اوجو آرخايا باخيرسان. سن دئمه، كيمسه قالماميشدي. دؤرد بئش آدديم آتيرسان، غريبسه‌ييرسن، باغچايا گيريرسن. چانتانداكي ايپي چيخاريب، گئجه‌نين او چاغيندا بير اوجونو سالخيم سؤيودون بوداغينا باغلايير، او بيري اوجونو دا دويونله‌ييب، بوينونا ساليرسان. هر شئي حاضيردير. آياغي‌نين آلتينداكي يئشيك قاچير، هاوادا اسيرسن. ساللانيرسان. سوباي كيشي ده گئدير.
هاميدان اؤنجه گلميشديم. آمما ايندي هاميدان آخيرا قالميشام. داها دوشونمورم. كاغيذي بوكده‌له‌ييب آتيرام. بئیينيم چالخالانير. بونلاري من دئييرم. گولشچي‌يه غيبطه ائديرم. گولشچي كوچه قيزلارينا توخونموش يئددي جاوانين آغزي بورنونون سويونو قاتيب بير بيرينه. يانيلميرام‌سا دونن گوناورتا چاغي اونلاري بير بير ائولريندن چكيب، انگ‌لريني ازيشديريب. اوچو اؤلوب، ايكيسي خسته‌خانادادير، آغير حالدا. ايکيسي ده ائوده يورغان دؤشه‌يه دوشوب. گولشچي جاوان اوغلان‌دير. ساواشانا هئچ اوخشامير. آسيلماغا گئدرکن، هئچ دؤنوب گئري باخمادي. تکجه آداخليليق اوزويونو قويدو اووجوما، دئدی منيم هئچ آداخليم يوخدور. اؤلن‌لرين بيري اونون اوزونو جيرماقلاماسايدي، آدام اؤلدورمه‌يينه اينانماياجاقديق. گؤزلرينه باخاندا اوره‌يينده‌كي آرخايينليغيني بوسبوتون دويوردوم. آمما منيم بئينيم چالخالانير. گؤيده اوچان ميغ‌ميغالاردان توتموش، دؤشهمهيه تؤكولموش سيقارئت كولونه‌دك ماراقلانديرير مني. بونلاردان داها چوخ، گؤرهجهييم يوخونو دوشونورم.
گون اورتاچاغي بيرجه کاسا سولو لوبيا قاپي آلتيندان ايچهري قويولور. يئمهيه ايشتاهيم يوخدور، يوخوم گلير. ياتيرام. يوخو گؤرورم. گؤرورم كي، هانسي‌سا زنداندان قويوب قاچميشام. آستا قاچانا شئيطان غنيم. اَينيمده يول يول پالتار. شهردن چيخيب خارابا کرپيج کوره‌سی‌‌نين آرخاسيندا اؤزومه امن بير يئر آختاريرام. پالتاريمی دَييشمه‌‌سم تانيياجاقلار. کؤينه‌ييمی چيخارماغا دارتينيركن جيب تئلفونوم اليمدن دوشور. تئلفون باشلايير دانيشماغا. کيمسه چاغيرير مني. سس ياخينلاشا ياخينلاشا اوجالير: دور آياغا. يوخودان آييليرام. باشيمين اوستونومو كسديريبلر؟
سحر آچيليب. تورانليقدا هامي ياتيب، بيرجه من اوياغام. عسکرلر قاريشقا كيمي خيرداجا باجانين آرديندا قايناشيرلار. بونو چكمه‌لرين سسي و گلن گئد‌ن‌لرين شاققيلتي‌سي دئيير.
باجايا دونوخموشام. بو نه سسدي؟ بلكه آچارلار شاققاشاقلا قيفيل‌لارا توخونور. دمير داراق‌لار آچيلير، محكوم‌لارين آدي بير بير اوخونور. هامي بوراخيلير. من عؤمورلوك قاليرام.