"كؤلگه‌لر، قيلينج‌لار" سيلسيله‌سيندن (3)
نئچه گون اؤنجه سایین همت شهبازی‌دن بیر مقاله اوخودوم: «مئدیا و پست‌مدرنیزم». اؤزـ اؤزومه دئدیم کئشکه بئله‌جه یازیلمایایدی. منه ائله گلدی کی، مقاله گئنل‌لیک‌له بیر یانلیش دوشونجه اوزه‌رینده قورولوب. پست‌مدرنیزمین منیمسه‌نیلمیش آنلامی ایله باغلی بدیهی بیر یانیلما. بوندان کده‌رلنمه‌یه بیلمزدیم.
بوندان اؤنجه "فاشیزم مئتودولوگییاسی" باشلیقلی مقاله‌می سایین اوخوجولارا تقدیم ائده‌جه‌ییمی وعد وئرمیشدیم. مقاله‌نین بوراخیلیشی گئجیکدی، و هر بیر گئجیکن اثریم کیمی یئنی یئنی ال گزدیرمه‌لردن آماندا قالمادی. بئله کی، اونو گؤزدن کئچیر‌ه‌رکن یئنی مولاحیظه‌لر آرتیردیم، سونوجدا اونون حجمی اللی صحیفه‌نی آشدی. بونون اوچون اونون متنینی سایین اوخوجولارا بؤلوم‌بؤلوم سونمازدان اؤنجه هله‌لیک بعضی فراگمئنت‌لر وئرمه‌یی مقصده اویغون گؤرورم. بو سیز بو دا مقاله‌دن بعضی جومله‌لر:
كؤلگه‌لر، قيلينج‌لار (1)
“شعر وارلیغین ائوی‌دیر” باشلیقلی کیتابین آنالیتیک تانیتیمی
2006-جي ايلده نشر ائديلميش “شعر وارلیغین ائوی‌دیر” باشليقلي كيتاب آذربايجان فيكير تاريخينده بير حاديثه‌دير. شعرين (اؤزه‌لليك‌له آذربايجان شعري‌نين) گؤزه‌لليك فلسفه‌سيندن سؤز آچان كيتاب اوچونجو دفعه ايشيق اوزو گؤرموشدور. بيرينجي باسقيدا كتابين حجمي 180 صحيفه ايدي، آمما بو باسقيدا حجم 400 صحيفه‌يه قده‌ر آرتميشدير. اوسته‌ليك بيرينجي باسقيدا گئده‌ن ماتئريال‌لارين دا اوچده ايكي حيصصه‌سي دييشديريلميشدير.
ائگزيستانسياليزم مکتبينه گؤره، اينسانين دييشمز کيم‌لييي يوخدور، اينسان اؤزونو گليشديرير. بئله‌ديرسه، قادينين داها چوخ ائموسيونال (يعني عاطفي، دويغولو) اولماسي, کيشي‌نين ايسه عاغيل‌لي اولماسي باره‌ده ادعالار ناغيل‌دير، بوش سؤزدور. بو سؤزلر گله‌نک‌لردن و ايجتيماعي نورمالاردان گلمه اويدورمالاردير.