اوخویون گؤز قیرپیمیندا شاعیر اولون!
شاعیرلييه باشلاماق اوچون اون گؤستهريش
داش داشیماقدان دا چتین گؤرهردیم شاعیرلییی. بیرجه شعر حاققیندا یازماغی شعردن چتین ساناردیم. آمما جواد مجابینین خیرداجا بیر یازیسینی اوخودوقدان سونرا یانیلدیغیمی آنلادیم. گؤبهلک کیمی گؤیهرن شاعیر قوشونونون سایی بونون دانیلماز بلگهسیدیر. بو سیز بو دا شاعیر اولماق اوچون او جنابین اون گؤستهریشی:
ایواز طاها
ـ تنقيدچيلري حئيران قويان، عئيني حالدا اونلارين غرورونو سينديرمايان شئيلر يازين.
ـ البته اوخوجولاري دا حئيران قويماليسينيز. بونون اؤزو ايسه اولدوقجا چتيندير. استراتژي باخیمیندان اوزون بير شعرده اوخوجونون باشا دوشدويو ان آزي بير سطرين اولماسي ضروريدير. قالانيني باشا دوشمهسه ده عاليجنابليق اوزوندن ذهنيني اله آلابيلمهدييي حسابينا قوياجاق. مدرن دونياميزدا گئدن «آنلاماق ياريشيندا» گئري قالماسين دئيه، نه اينكي «باشا دوشمهديم» دئمهيهجك، اوستهليك شعردهكي بوشبوغازليقلاري تعريفلهيهجك.
ـ باشيازارلا دوستلوق ائتمك، تنقيدچي ايله يولداشليقدان داها فايداليدير. بو ايش، زيانين قارشيسيني داها قولايليقلا آلار.
ـ موباحيثه دوغورماق، کسکینلیکله تؤوصيه اولونور. كتبي موناقيشه ال به ياخا اولماقدان داها ياخشيدير. سؤز دؤیوشدورمه، اؤزو ده ادبي شايعهلر شبكهسينده، ال وئریشلی ساييلير. آنجاق اوقدهر اولماسين كي، هميشه دؤيولهسينيز. کوتله، دؤيولن شعره اؤز قوجاغینی اوزون سوره آچا بیلمز.
ـ ياييمائولری كتابينيزي چاپ ائتمهدييي تقديرده، اونو سانسور و تهلوكهسيزليك مسئلهلرينه باغلايین. بونو ائده بیلسهنیز بؤيوك اعتبار قازانا بيلرسينيز.
ـ بوتون حريفلري دانماغا چاليشين. بو ايشي ان بؤيوك رقيبلردن باشلايين.
ـ دونيا ادبياتي ايله تانيش اولماسانيز دا اؤزونوزو ساوادلي گؤسترين. بو ايش هئچ كيمي اؤلدورمهييب.
ـ ائله داورانين كي، ائلهبيل تاريخ، مدنيت و مدرنيزم سيزينله باشلاييب.
ـ املا و انشا یانلیشلیقلارینیزین اوستو آچيلديقدا بيآبيرچيليق درجهده سويوق قانليليق گؤسترين. «اينترنت دؤورونده ... [بونلاردان] دانيشماق بوش بوغازليقدير» كيمي سؤزلري تكرار ائتمكله قارشی طرفی چيخيلماز دوروما سالین. البته اؤنجه اونون اينترنتدن باشي چيخماديغيني اؤيرهنين.
ـ هر بير ايراد قارشيسيندا اؤزونوزه تام ايناملا آشاغيداكي سؤزلري دئيين: «من بئله گؤرموشم، من بونو بهيهنيرم، منه بئله الهام اولوب، شعر منه بئله يازديردي.»
ـ اؤزونه اينام، درين بيليكدن داها چوخ، درين جهالتدن ايرهلي گلهبيلر. لاپ بيزيم بو يازيدا اون گؤستريش يئرينه اونبير گؤستريش اوخودوغونوزا باخماياراق اونايكينجي و اينديليكده سونونجو گؤستريش بئلهدير: کوتله آرتيق، يئني شاعير كشف ائتمك حؤوصلهسينه مالك دئييلدير.
بو وظيفهني اؤزونوز اؤز اوزهرينيزه گؤتورهرك هر يئرده و هر يوللا اؤزونوزو تبليغ ائدين. تئز و قولايليقلا قبول اولماقدان قورخمايين. اونوتقان و یئلبئیین دینلهییجیلر چوخدور.