"دلي" آدلی رومان نهايت‌کي باشا چاتدي. ايواز طاهانين دئديينه گؤره، 1996ـ‌جي ايلين يازيندا باکيدا بو اثرین تأليفينه باشلاميش، اوزون سوره اونو اونوتموشدور. آمما اؤتن پاييزدا موغاندا اولارکن روماني باشا چاتديرماق قرارينا گلير. اثرين آدي کئچيجي‌دير و چاپدان اؤنجه دييشه بيلر. (روماندا اورتوگرافيک علامت‌‌لره بوتونلوک‌له‌ رعايت اولونموشدور. اگر اونون اوخونوشوندا چتين‌ليک چکسه‌سه‌نيز ايمئيلميز واسيطه‌سي ايله آذربايجان تورکجه‌سي‌نين ايملاسينا اويغونلاشديريلميش "لوتوس" فونتونو بيزدن الده ائده بيلرسينيز.) روماندان بير پارچا:

مين­آتيلاني [مسلسلی] ائيواندا قوردوق. آياقليق‌لاري گؤده‌ک اوْلدوغوندان، ياتاق تاختيني سورودوك ائيوانا. ايندي مين‌آتيلان تاختين اوستوندن بوٍتون مئيداني ال­ايچي‌ كيمي گؤروردو. حؤرمه قارغي‌اوْتوراجاغي چكديم آلتيما. قونداغي داياديم كؤكسوٍمه، سوْل گؤزومو قيييب، ساغ گؤزوم­له باخينجادان [مگَسَك­دن] باخاراق مين­آتيلاني فيرلاتديم: ساغدان سوْلا، سوْلدان ساغا. باخينجادان باخان من دئييلديم، توٍفنگین اؤزو ايدي كي، شرارت دوْلو گؤزلرله ماريتلاميشدي. بارماغيمي ته­تييه [ماشايا] قوْيدوم. اوٍره­ييم ته‌تيکده دؤيوٍنوردو. بيلميرديم بارماغيمين نبضي دؤيوٍنور، يوْخسا ته‌تييين گؤده‌ك ساپلاغي قوش­اوٍره‌يي كيمي ياتيب قالخير.